Սպահանի հարավում թշնամու երկու Black Hawk ուղղաթիռի և մեկ C-130 ռազմատրանսպորտային ինքնաթիռի ոչնչացման առաջին կադրերն է հրապարակել իրանական ԻՐՆԱ լրատվամիջոցը։
Երեկ՝ ապրիլի 4-ին, Fars գործակալությունը հայտնել էր, որ Իրանի Քոհգիլույե և Բոյերահմադ, ինչպես նաև Բախտիարի նահանգների ցեղախմբերը, միմյանցից անկախ գործելով, երկու Black Hawk ուղղաթիռ են խոցել դժվարանցանելի լեռնային շրջաններում՝ Իրանի զինված ուժերի տեղակայման վայրերից հեռու։
Այսօր արդեն Իրանի ԻՀՊԿ-ն հայտնել է, որ խոցել է C-130 ռազմատրանսպորտային ինքնաթիռը, որը մասնակցում էր Իրանի վրա խոցված F-15 կործանիչի օդաչուի փրկության գործողությանը։
Ավելի վաղ Իրանի ԻՀՊԿ-ն հերքել էր խոցված կործանիչի օդաչուի փրկության մասին ԱՄՆ հայտարարությունները։
ԱՄՆ նախագահ Դոնալդ Թրամփը հայտարարել էր Իրանի վրա խոցված F-15 կործանիչի օդաչուի փրկության մասին «դավադիր լեռներում»։
Ըստ Axios-ի հետ զրուցած ամերիկացի պաշտոնյաների, իրականացվել է բարդ գործողություն՝ ԿՀՎ-ի և կոմանդոսների ջոկատի ներգրավմամբ։
Նշվում էր, որ գործողության բոլոր մասնակիցները, ներառյալ օդաչուն, այժմ գտնվում են Իրանի սահմաններից դուրս։
