Հայաստանում պարարտանյութն արդեն իսկ թանկացել է ավելի քան 20 տոկոսով։ Միջազգային շուկայում մինչև 35% աճ է կանխատեսվում։ Հայաստան ներկրվող պարարտանյութի մոտ 20 տոկոսը գալիս է Իրանից։ Պատերազմի պատճառով այս ուղղությունը դարձել է խնդրահարույց, իսկ մյուս մատակարարները՝ Ռուսաստանն ու Վրաստանը, պահանջարկի մեծացմանը զուգահեռ, բարձրացրել են գները։
Հայկական ագրարագյուղացիական միավորման նախագահ Արտյոմ Բերբերյանը NEWS.am–ի հետ զրույցում նշեց, որ թեև այս պահին Հայաստանում պարարտանյութի դեֆիցիտ չկա, սակայն եթե Իրանում պատերազմը երկարի, խնդիրներ կունենան բոլոր երկրները, նույնիսկ Եվրոպան։
Նրա խոսքով՝ թանկացած պարարտանյութը շղթայական ռեակցիայով ազդելու է գյուղմթերքի գների վրա։ «Իհարկե գնաճ լինելու է, բայց քանի՞տոկոս կլինի, կախված է պետական սուբսիդիաներից, հարկերի նվազեցումներից և այլ նմանատիպ գործողություններից»,– նշեց Արտյոմ Բերբերյանը։ Նա ստեղծված վիճակից ելքը համարում է ծրագրերի վերանայումը․ «Բոլոր ծրագրերը պետք է վերանայվեն՝ ոչ միայն պետական, այլ նաև ֆերմերային։ Պետությունն էլ ֆերմերների պլանավորման համաձայն պետք է նաև ձևավորի իր սուբսիդիաները»։
Ու թեև տարածաշրջանում լոգիստիկ ուղիները ծանրաբեռնված են, իսկ որոշ ուղղություններով կան լուրջ խոչընդոտներ, կառավարությունն իրավիճակը վերահսկելի է համարում։ Մրցակցության և սպառողների շահերի պաշտպանության հանձնաժողովի նախագահը դեռևս մտահոգվելու պատճառ չի տեսնում։ «Այս պահին որևէ անհանգստացնող պատկեր չունենք։ Բեռնափոխադրումների մեծ մասը բնականոն հունով գնում է»,– նշեց Գեղամ Գևորգյանը։
