Մահվան ելքով վրաերթ Իսակովի պողոտայում

Shamshyan.com-ի փոխանցմամբ՝ այսօր՝ հուլիսի 27-ին, ողբերգական ճանապարհատրանսպորտային պատահար է տեղի ունեցել Երևանում։ Ժամը 10:40-ի սահմաններում Իսակովի պողոտայում՝ «Երեքնուկ» կամրջի վրա, «Lexus» մակնիշի ավտոմեքենան վրաերթի է ենթարկել հետիոտնի։

Նախնական տվյալներով՝ ավտոմեքենան վարել է Երևանի բնակիչ, 21-ամյա Արսեն Խ.-ն, իսկ վրաերթի ենթարկվածը Կոտայքի մարզի բնակիչ, 62-ամյա Սեդրակ Ի.-ն էր։

Ըստ http://Shamshyan.com-ի՝ վարորդը դեպքից հետո չի դիմել փախուստի, անմիջապես ահազանգել է շտապօգնություն։ Սակայն ժամանած բժիշկները արձանագրել են հետիոտնի մահը։

Դեպքի վայր են ժամանել ոստիկանության պարեկային ծառայության աշխատակիցներն ու ՀՀ քննչական կոմիտեի քննչական խումբը։ Դեպքի փաստով նախաձեռնվել է քրեական վարույթ, իսկ վարորդը ենթարկվել է սթափության փորձաքննության, որի արդյունքներով եղել է սթափ։

Հանգամանքները պարզվում են նախաքննության ընթացքում։