Ադրբեջանական ծագման 1-2 արտադրանք է եկել Հայաստան՝ բենզին և դիզվառելիք, իսկ Ադրբեջանի տարածքով գրեթե ամեն օր մի բան գալիս է։ Այս մասին, այսօր՝ ապրիլի 4–ին, ՔՊ արտահերթ համագումարից առաջ լրագրողների հետ ճեպազրույցում նշեց ՀՀ էկոնոմիկայի նախարար Գևորգ Պապոյանը։
«Օրինակ, սուպերմարկետների ցանցերից մեկը՝ «Նոր Զովքը», դիմել է, որ Ադրբեջանի տարածքով բերի սպիտակաձավար, մեկ ուրիշ կազմակերպություն դիմել է, որ բերի ռուսական քարածուխ, այն մյուսը բերում է հացահատիկ, այն մյուսը արդեն բերում է պարարտանյութ։ Սա արդեն շատ սովորական երևույթ է դարձել։ Ես արդեն կորցրել եմ հաշիվը ապրանքատեսակների ցանկը»,–ասաց նա։
Հարցին՝ չկա՞ որևէ ապրանք, որ Հայաստանը կարող է արտահանել Ադրբեջան, Պապոյանը դրական պատասխան տվեց. Կա այդպիսի ապրանք, կոնկրետ հայտ եղել է փայլաթիթեղի նկատմամբ, և կոնկրետ փայլաթիթեղի համար ադրբեջանական կողմը խնդրել է կոնկրետ գին, և մեր արտադրողը տվել է։ Այսինքն ասել են՝ այսինչ հաստության փայլաթիթեղը մեզ հետաքրքրում է, կարո՞ղ եք ասել՝ ինչ ծավալով, ինչ ժամանակում և ինչ գին կարող եք տալ։ Մեր արտադրողը ծավալը, գինը տվել է, դեռ պատասխան չենք ստացել»,–ասաց նախարարը։
