Չարենցավանի նախկին համայնքապետ Կավալենկո Սուրենի Շահգալդյանը հրավիրվել է ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն՝ իրեն պատկանող գույքի առնչությամբ իրականացված ուսումնասիրության շրջանակներում դիրքորոշում հայտնելու, ինչպես նաև հայտարարագիր ներկայացնելու համար։ 1inlurer.am-ը այս մասին տեղեկանում է Ազդարար հարթակից։
«Ղեկավարվելով «Ապօրինի ծագում ունեցող գույքի բռնագանձման մասին» օրենքի 16-րդ և 17-րդ հոդվածներով՝ ծանուցում եմ, որ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում Ձեզ պատկանող գույքի առնչությամբ իրականացվել է ուսումնասիրություն, որի արդյունքում կազմվել է ամփոփագիր»,- նշվում է ծանուցման մեջ։
Ծանուցման համաձայն՝ Շահգալդյանը հրավիրվել է դատախազություն 2026 թվականի հոկտեմբերի 30-ին՝ ժամը 12:00-ին։ Նրան առաջարկվել է ծանուցումն ստանալու պահից մեկ ամսվա ընթացքում ներկայանալ վարչություն՝ գործի նյութերին ծանոթանալու, դիրքորոշում հայտնելու և հայտարարագիր ներկայացնելու նպատակով։
Նույն գործով Դատախազություն են հրավիրվել նաև Շահգելդյանին փոխկապակցված անձինք, այդ թվում նրա որդին՝ Հակոբ Շահգելդյանը։
