Մարիաննա Գևորգյանը՝ միջազգային մրցույթի հաղթող․ հայ քանոնահարուհին հերթական անգամ բարձր է պահել հայկական երաժշտության պատիվը միջազգային բեմում

Հայկական երաժշտարվեստը միջազգային հարթակներում ներկայացնող քանոնահարուհի Մարիաննա Գևորգյանը հերթական նշանակալի հաջողությունն է գրանցել՝ դառնալով «InterContinental Music Awards-2026» միջազգային մրցույթի հաղթող։

Մարիաննա Գևորգյանը հաղթել է մրցույթի «Լավագույն երաժիշտ» անվանակարգում։ Այս տարվա մրցույթին մասնակցել է ավելի քան 3500 երաժիշտ՝ աշխարհի ավելի քան 100 երկրից։

Գևորգյանը տարիներ շարունակ իր կատարումներով ներկայացնում է հայկական ազգային երաժշտությունը՝ քանոնը դարձնելով հայկական մշակույթի յուրահատուկ այցեքարտ միջազգային բեմերում։

Նրա մասնագիտական ճանապարհը նշանավորվել է բազմաթիվ հանրապետական և միջազգային մրցույթների ու փառատոների հաղթանակներով։ 2020 թվականին նա դարձել է World Folk Vision համաշխարհային մրցույթի գլխավոր մրցանակակիր՝ «Աշխարհի ժողովուրդների երաժշտություն» անվանակարգում՝ մրցելով 115 երկրների 3950 մասնակիցների հետ։

Մարիաննա Գևորգյանի հերթական միջազգային հաղթանակը ևս մեկ անգամ ընդգծում է հայ երաժշտարվեստի բարձր մակարդակն ու հայկական ազգային նվագարանների նկատմամբ միջազգային հետաքրքրությունը։

Քանոնահարուհու հաջողությունները ոչ միայն անձնական ձեռքբերում են, այլև հայկական մշակույթը միջազգային հարթակներում ներկայացնելու կարևոր հնարավորություն։ Նրա յուրաքանչյուր ելույթ և մրցանակ նոր լսարանների է ծանոթացնում հայկական երաժշտության հարուստ ժառանգությանը։