«Դիլի» կաթնամթերքի արտադրության վերագործարկումը բազմաթիվ հարցեր է առաջացրել սպառողների շրջանում։ Հունիսին Սննդամթերքի անվտանգության տեսչական մարմինը (ՍԱՏՄ) ստուգումների արդյունքում արձանագրել էր խախտումներ, որոնց հիմքով կասեցվել էր ընկերության արտադրական գործունեությունը։
Արդեն հուլիսին հայտարարվեց, որ ընկերությունը վերացրել է արձանագրված խախտումները, ինչից հետո ՍԱՏՄ-ն թույլ է տվել վերսկսել արտադրությունը։
Սակայն հանրության մոտ շարունակում են մնալ հարցեր. ի՞նչ կոնկրետ միջոցառումներ են իրականացվել արտադրությունում, ի՞նչ լաբորատոր հետազոտություններ են կատարվել, արդյո՞ք բոլոր արտադրատեսակները կրկին փորձաքննության են ենթարկվել, և ինչ հիմքով է ՍԱՏՄ-ն եկել այն եզրակացության, որ արտադրությունն արդեն համապատասխանում է սննդամթերքի անվտանգության պահանջներին։
Ըստ գործող օրենսդրության՝ եթե տնտեսավարողը վերացնում է ստուգման ընթացքում հայտնաբերված խախտումները, իսկ վերահսկող մարմինը վերահաստատում է դրանց վերացումը, ապա կասեցումը կարող է հանվել, և արտադրությունը՝ վերսկսվել։ Այդուհանդերձ, սպառողների վստահության լիարժեք վերականգնման համար կարևոր է, որ գործընթացը լինի հնարավորինս թափանցիկ և հանրությանը ներկայացվեն համապատասխան պարզաբանումներ ու վերահսկողության արդյունքները։
